“They don’t buy what you do, they buy why you do it.”
Simon Sinek
Нийгэм эдийн засаг хөгжихийн хэрээр бизнес хоорондын өрсөлдөөн урьд өмнө байгаагүй ихээр өрнөх болжээ. Мөн цоо шинэ санаа гаргана гэдэг өдрийн од шиг ховор болж. Би шинийг санаачиллаа гээд зарлатал бөмбөрцөгийн хаа нэгтээ, хэн нэгэн хэдийн санаачлаад хийчихсэн байх нь, байхгүйгээсээ их болж.
Тиймээс ихэнхдээ та бид бизнес эрхлэхдээ бусад ижил төрлийн үйлчилгээтэй хүссэн хүсээгүй өрсөлдөх шаардлага гардаг. Энэ өрсөлдөөнд ялгарал гэдэг хамгийн чухал хүчин зүйл юм. Таны бизнест ялгарал байхгүй бол давсгүй хоол, оргилуун дарсгүй шинэ жил л гэсэн үг.
Ялгарал үгүй бол хэрэглэгчид үл харагдаж, тэлэлтийн боломжууд хумигдаж, ажилтнууд тань таны компанид ажиллах зорилго, тэмүүлэлгүй болдог. Гэтэл бусадтай л ижил бүтээгдэхүүн үйлдвэрлэж байж тэднээс хэрхэн ялгарах билээ?
Өнөөдрөөс нэгэн арваны өмнө Simon Sinek гэх эрхэм TED индэр дээрээс өрсөлдөөнд ялгарах ялгарлаа хэрхэн бий болгох тухай алдартай илтгэлээ танилцуулжээ. Хэдий олон жилийг өнгөрөөсөн ч гэсэн энэхүү илтгэлийн хүч хэвээр байсаар байна.
Энэхүү илтгэл дээр танилцуулсан аргачлалыг Sinek’s Golden Circle гэж нэрлэжээ.
Тэрээр чухам юу ярив?
Бид ихэвчлэн “Та юу хийдэг вэ?” гэж асуух үед хэрчсэн гурил, нарийн боов, эсгий таавчиг, интернет худалдааны платформ, маркетингийн зөвлөх үйлчилгээ, сэнжтэй аяга гэх мэт ЮУГ хийж байгаагаа хэлдэг.
Гэтэл таны ЮУГ хийж байгаа бусдад төдийлөн сонин биш аж. Бас хүний тархи үүнийг ач холбогдолтойгоор хүлээн авч шийдвэр гаргахад нь нөлөөлдөггүй гэнэ. Харин үүний оронд ЯАЖ? гэдэг асуултанд хариулах нь илүү ахицтай үр дүнд хүрнэ.
Бүр хамгийн зөв бөгөөд үр дүнтэй арга бол ЯАГААД? гэдгээ хэлэх хэрэгтэй. Ингээд Sinek’s golden circle-г тайлбарлахад ашиглагддаг алдартай жишээ авцгаая.
Та сэнжтэй аяга үйлдвэрлэжээ. Өмнө нь сэнжтэй аяга байхгүй байж. Хэрэглэгч тань дээр ирээд “Таны хийсэн зүйл юу вэ?” гэж асууж. Энэ асуултанд дараах хоёр байдлаар хариулж болно.
1. Би сэнжтэй аяга хийсэн. Энэ хажууд нь байгаа гогцоо шиг зүйлийг сэнж гэдэг. Үүнийг хийхдээ аяганы нэг талд нэмэлт шавраар гараар барьж болохуйц гогцоо үүсгэсэн юм. Тэгээд аягатайгаа цуг зууханд шатаагаад гаргахаар аяганы нэг хэсэг болдог. Яагаад үүнийг хийх болов гэхээр…
2. Би халуун кофе аягандаа хийж уухаар гарт удаан барьж болохгүй халаад байсан юм. Тиймээс ихэвчлэн аль ойр байгаа ширээ юм уу тавиур дээр тавьж орхиод дахин дахин авч балгах хэрэгцээ гараад эсвэл нэг газраа мартаад эргэж олох болоод байсан. Тиймээс гарт барьж болохуйц гогцоог аяга хийж байх үедээ нэмэлтээр хийж шаврын зуухандаа шатаасан нь энэ. Сэнжтэй аяга. Одоо гар халахгүй, мөн аягаа мартаж орхихгүй. Кофегоо ч халуунаар нь тухтай уух болсон.Та дээрх хоёр сонголтын аль хувилбарт нь илүү ач холбогдол өгч сонсох байсан бэ?
Хүн гэдэг амьтан өөрт ач холбогдолтой эсэхийг өнгөрсөн түүх, туршлагатайгаа холбож ойлгох нь элбэг аж. Тиймээс эхний хувилбарын хариултанд ихэнхдээ дөнгөж тайлбарлаж эхлэх үед нь “Аан…” гээд л бодохоос залхуурч, олон асуултаас зугтан яваад өгдөг бол хоёрдох хариултанд “Надад тохиолдсон асуудалтай адил юм…” гээд шууд шийдвэр гаргалтын түвшинд хүлээн авдаг байх нь.
Яагаад ингэж ялгаа үүсдэг вэ? гэдгийг дээрх зураг дээр тодорхой тайлбарлажээ.
Тиймээс та хэрэглэгчдээ бүтээгдэхүүнээ тайлбарлахдаа эсвэл ажилтнууддаа хийж буй ажлын чухлыг нь ойлгуулахдаа Why-с үргэлж эхэлж байгаарай.
Ингэснээр таны бүтээгдэхүүн бусадтай ижил хэдий ч зорилго, шалтгаанаараа тодоос тод ялгарч, төсөөлснөөс давсан үр дүнг авч ирж, үнэнч хэрэглэгчид бүрдэж, чадварлаг ажилтнууд Why-ын төлөө ажилласаар байх болно.
Учир нь хэрэглэгч таны ЮУГ хийснийг биш, ЯАГААД үүнийг хийсэн учир шалтгааныг худалдаж авдаг ажээ.